Biberstufe

Hallo zämme,

Ich bin d Salome Schluchter aber in de Pfadi heiss ich Fiocca. Ich leit siit November 2022 d'Biber. Vor de Biber han ich drei Johr d'Wölf gleitet. Nach em BuLa han ich mich dezue entschide vo de Wölf zu de Biber z wächsle will ich nonig paarat gsi bin ganz mit de Pfadi ufzhöre.

Selber bini siit 2010 in de Pfadi und es macht mir bis jetzt mega Spass und ich freu mich uf no vieli wiiteri Johr.

Nebe de Pfadi studier ich Psychologie, Kriminologie und Englisch an de Uni Bern.

Salut zämme,

Min Pfadiname isch Cupido aber die meiste nenne mich Cuppe.

Im Johr 2006 han ich d Pfadi für mich entdeckt und bin sither voller Härzbluet mit debii.

Vor minere Zyt als Biberleiter han ich bereits mehrjöhrigi Erfahrige als Pfadi- sowie als Pioleiter dörfe sammle. All die Erfahrige dörf ich jetzt sit mitti 2022 bi de Biber iibringe und de Kinder so witerhin die schöne und blibende Erläbnis biete die ich sälber in minere Zyt als Pfadi erläbt han. 

Allzeit Bereit und mit Freud drbi, 

Cuppe

Sali zämme, min Name isch Gabriel Kündig, aber in de Pfadi heiss ich BiToku. Sit 2014 bin ich jede Samschtig fröhlich i dPfadi gange. Ab 2019 Pio bin ich in de Piostufe Nimmerland gsi und ha mich im Bundeslager 2022 dezue entschide in de Biberstufe zleite. Bis jetz bereu ichs kei Stück und freu mich uf jede Samschtig dusse in de Natur mit mine Mitleitende und all unserne tolle Biber!

Unter de Wuche gang ich ans Gymnasium Leonhard mit em Schwerpunkt Musik, wo ich im 2023 schliesslich mini Matur mach.

Bis am Samschtig - BiToku

Salüü zämme,
Ich bi d Anaïs Schmidt aber die Pfadi heiss ich Eyja. 2012 bin ich bi minere erschte Wölfliüebig gsi, was ich als eini vo mine beschte Entscheidige bezeichne würd. Siit dem verbring ich alli mini Samstignomittäg in de Pfadi. Do sind vieli vo mine beschte und längschte Fründschafte entstande. Nachdem ich 2015 in Pfadi übertrete bin, ghör ich sit 2020 au zude beschte Piogruppe Matrjoschka.
Jetzt dörf ich sitem Herbscht 2021 d Biber jede zweite Samstignomittag ufeme neue Abendtüür begleite.
Näb de Pfadi gang ich ins Gymi Münschterplatz in Basel mitem Schwerpunkt Spanisch. 

Bliibet motiviert und bis neggschte Samschtig- Eyjaaaa

Hoi Zämme! 

Min Name isch Sinia Gloor aber do ide Pfadi heiss ich Aqua. Ich ha im Johr 2012 sGlück gha, dass mich e gueti Kollegin mit a mini ersti Pfadiüebig gno hett und has vo Afang ah super gfunde! Ich bin sitt dem immer ide Pfadi gsi und leit jetzt sitt em März 2019 unseri jüngste Mitglieder, d Biber. Näbe de Pfadi studier ich in Züri ade ETH Umweltnaturwisseschafte, de Weg haltet mi aber trotzdem nit devo ab all zwei Wuche nach Rhiifelde id Pfadi zgo!

Allzeit Bereit
Aqua

In dr Pfadi bini dr Tabasco und sit minr allererste Wölfliüebig bidr Tanksperri 1999 drby. Genau so unvrgässlich wie de ersti Alass isch au so zimlig jedes andere Abendtür gsi, woni in dr Pfadi ha dörge erlebe. Pfadi macht mir au jetzt no immr so viil Spass wie dazumals. Irgndwenn bini denn Pfadileiter und schliesslich Abteiligsleiter worde, bevori mit e paar andrne Leitende d Bibrstuefe ufzoge hen. Weni nid grad in dr Pfadi bin, denn schaffi im Gsundheitswese, spiil e paar Volleybäll übrs Netz odr tribmi neume in de Bärge umenand.

Allzeit Bereit und mit Freud Drby

Tabasco