Moin ich bin d Edge und in de freizit nennt mer mich Phillip. Ich bin sit em  2013 mit vollem stolz in de Pfadi. 2022 bini in d Piostuefe Aquila übertrette und sit em januar 2024 bin ich e Teil vom Wölflileitigsteam.
Nebe dr Pfadi mach ich e  Lehr als Zimmermaa. Usserdem spieli no Basketball bi de Rhifüks
Ich freu mi riesig uf die nöchste Johre!

Allzeit bereit
Edge

Hey Zämme  Ich bin d Fabienne Gasser. Ide Pfadi heiss ich Mime.

Siit 2012 bin ich debii. So vieli und tolli Erläbnis ha ich in de Pfadi dörfe erläbe, vieli Fründschafte gschlosse und no vieles meh.  2020 bin ich denne ind Piostufä Matrjoschka cho, wohni Sache erläbt ha, die ich nie vergesse wird. Sit Neujohr 2022 leit ich bi de Meute Kalanag.  Momentan mach ich e Lehr als Kauffrau bide Versicherig. Ich freu mii uf vieli erläbensrichii Samstignomitäg und Lager!

Hoi zämme
Ich bin de Ruben und heisse in de Pfadi Tempo. Ind Pfadi oder besser gseit ind Wölfli bin ich im 2010 choo. Mini Ziit als Wölfli hanni mega toll gfunde und ich ha vieli gueti und schöni errinerige vo damals. Ich bin im 2015 ind Pfadistuefe überträtte und ha au vo dörte no vieli gueti Errinerige. 

S beste an de Pfadii hanni natürlich immer d lager gfunde und alles wasmer in de Pfadi mit sine Kollege und Mitmänsche het chönne erläbee. D Aktivitäte sind natürlich au immer voll cool gsi.

2019 bin ich ind Piostufe Nimmerland cho und ha denn afangs 2021 bi de wölf afo Leite. Ich leite d Meute Kala Nag.

Näbe de Pfadi mach ich e Lehr als Chemie und Pharmatrchnolog .

Ich freu mich uf vieli gueti zuekünftigi Lager und Samstige.

Sali zäme

Ich bin de Jonas, i de Pfadi heiss ich aber Twister. Ich bin 2011 s’erschti Mol in de Pfadi gsi. Ich han die Ziit als Wölfli immer mega gnosse. 2015 bin ich denn in Pfadistufe cho.

Ich bin immer mega gern am Samstig an d‘Üäbigä gange und han mich immer gfreuft und gwundert was jetzt passiere wird. S’Coolste  han ich aber immer s‘Lager gfunde.

2020 bin ich denn in Piostufe матрëшка(Matrjoschka) cho.

Im Hela 2021 han ich agfange Wölfli bi Kala Nag z’leite.

Neb de Pfadi gang ich momentan in d’FMS Basel mit de Fachrichtig Gesundheit und Naturwissenschaften.

Ich freu mich mega uff viili tolli Erläbniss mit de Wölf.

Hallo Zämme
Ich bin de Silas. In de Pfadi heiss ich Snoopy. 2011 bin ich zum erste Mol ind Pfadi gange und sither mit vill Freud debi. 

Sit em Mai Weekend 2022 leit ich bi de Meute Toomai. 

Näbst de Pfadi, han ich mini Lehr zum Netzelektriker mit em Schwerpunkt Energie erfolgrich abgschlosse.

Allzeit Bereit
Snoopy

Hallo zämme

Ich heiss Luisa Müller aber inde Pfadi bin ich d'Ekara. Sit 2015 bin ich beigeistert vode Pfadi und ha vieli Fründschafte gschlosse und tolls erläbt.

2020 bin ich denne ind Piostufe матрёшка(Matrjoschka) überträte und sitem Novemberweekend 2021 leit ich  d'Meute Toomai.

Näbe de Pfadi bin ich momentan am Gymnasium Leonhard mitem Schwerpunkt Spanisch.

Ich freu mich uf vieli tolli Samstignomitäg und Lager!

Hallo Zämme 

Ich bin Delia Bedon und in de Pfadi heiss ich Raschka. Ich bin scho sit 2010 in de Pfadi und sit em Novämber-Weekend 2019 Wölfli-Leiter bi de Meute Toomai. Pfadi isch scho vo Ahfang ah en grosse Teil vo mim Läbe gsi und au jetzt mache mir d'Üebige und d'Lager immer no sehr spass. 

Sit ich vo mim Uslandsjoor in Kanada, im Joor 2018/19, zruck cho bin gang ich an d'FMS mit de Fachrichtig Kommunikation und Medien. 

Ich freu mich uf wiiteri tolli Joor mit de Pfadi Rhyfälde, Raschka